Mardi davomezdi aint il üert pro la Chasa Puntota: Abitantas ed abitants da la dmura d’attempats sezzan sün bankins a sulai, uffants cuorran sur il prà, las plattas d’aperitiv sun prontas, il prosecco es miss a frais-ch. I regna atmosfera da festa da famiglia. Eir scha’l plazzal da fabrica pel nouv stabilimaint da la canorta es fingià drizzà aint ed ün trax lavura, es la prüma palada ün mumaint important per tuot ils preschaints. «Id es fich bel da pudair esser hoz quia», disch Margreet Groot in seis bivgnaint. Dal 2022 ha ella preschantà il prüm plan da gestiun per üna nouva canorta. I sun seguidas bleras sezzüdas e bleras persunas d’eiran invoutas per realisar l’idea. 

Punts tanter generaziuns
In seis pled festiv ha dit il capo, Aita Zanetti: «I nun es be üna prüma palada per ün stabilimaint, quista prüma palada es importanta per l’avegnir da nos cumün». La nouva canorta saja ün lö ingio cha’ls uffants vegnan chürats bain e possan as sviluppar. «Al listess mumaint vegnan sustgnüdas famiglias e s-chaffidas premissas importantas per ch’ellas as saintan a lunga vista da chasa i’l cumün fusiunà». 

Specialmaing bel esa tenor Aita Zanetti cha la canorta vain realisada dasper la Chasa Puntota. Uschea possan gnir creadas punts tanter las generaziuns. «Giuven e vegl vegnan insembel in ün lö, tuots duos toccan pro nossa cumünanza e fan viver nos cumün», disch il capo. Quist proget saja ün’investiziun illa qualità da viver, illas famiglias e cun quai ill’attractività da la regiun.

Ün bun exaimpel per cooperaziun
Joachim Koppenberg, directer dal Center da Sandà Engiadina Bassa (CSEB), discuorra dad üna palada extraordinaria: «Extraordinaria perquai ch’ella simbolisescha che chi dvainta pussibel cun cooperaziun e cun üna tenuta da basa cumünaivla». In prüma lingia saja la nouva canorta üna nouva sporta per famiglias a Scuol e contuorns. «Cha quista canorta vain fabrichada sül areal dal CSEB in vicinanza da la Chasa Puntota demuossa prudenza ed ün pensar collià», manaja Joachim Koppenberg. 

Il directer s’allegra sül barat e sün activitats tanter las generaziuns «a favur da tuots». L’idea dad üna cumünanza sur las generaziuns dvainta culla nouva canorta realtà. Ün ulteriur avantag haja la canorta in vicinanza da las gestiuns dal CSEB pellas collavuraturas e’ls collavuratuors chi han uffants. 

Sustegn da tuot las varts
Margaritta Braumüller-Carl es co-presidenta da la società Chüra d’uffants Engiadina Bassa. In seis pled dà ella ün sguard inavo. In schner 2021 haja la suprastanza contactà al cumün. «Nus d’eiran in tschercha da nouvas localitats». Id haja dat blers discuors ed ideas. Pass per pass saja creschü ün proget concret. Il CSEB saja stat da la partida da prüma davent. «Culla parcella dasper la Chasa Puntota ha’l miss il prüm crap da fundamaint». Il cumün ha lura decis da realisar il fabricat pella società. 

A l’ultima radunanza da büdschet han votantas e votants dit da schi a la nouva canorta. Margaritta Braumüller-Carl s’ha ingrazchada pro las collavuraturas, las püttas chi portan la canorta: «Vus faivat mincha di la differenza pels uffants ed eir per vus nascha quista chasa». 

Ün proget cumplettamaing indigen
L’impressari general pro la fabrica da la canorta es Michi Beer. Ils plans d’architectura derivan da Strimer Architects SA. «Tuot las lavuors vegnan fattas cun firmas da l’Engiadina Bassa», disch Michi Beer. Il stabilimaint es sün duos plans. I dà üna plazza da giovar suot tet e locals generals (persunal, tecnica, schler ed ün local polivalent) sül plan terrain. Sül plan sura es la canorta cun locals i’ls quals duos gruppas pon gnir chüradas al listess mumaint ed üna cuschina cumünaivla. L’utuon 2027 dess il stabilimaint gnir inaugurà.