Quista jada maina il viadi cun uffants ed asens eir illa Val S-charl. In dumengia, ils 8 avuost, chantan ils uffants accumpagnats da Linard Bardill chanzuns dal god da dschember, da la natüra e dal plaschair da viver. Il viadi maina fin ill’Alp Tamangur chi’d es gnüda renovada ils ultims ons. Per Linard Bardill esa important da muossar als uffants ed a tuot la glieud, cha l’uman es eir üna part da la natüra. Quai füss eir stat ün dals temas dal prüm «World Ethic Forum», chi vess vairamaing gnü lö al principi d’october a Puntraschigna. Quist forum, chi vain organisà da Linard Bardill e chi metta l’etica i’l center da l’attenziun, es intant gnü spostà sün la fin d’avuost 2022. Ils uffants chi accumpagnan quist on a Linard Bardill e seis asens, vessan eir chantà per l’avertüra dal forum in october a Puntraschigna. Il concert da Linard Bardill ed ils «asensingers da Tamangur» ha lö in dumengia, ils 8 avuost, a las 11.30 a S-charl.

Text: Nicolo Bass