A Watschn, a Fotzn und a Maulschell'

Che schleppa! Be cha vus sajas avertieus: mê rir sur dals Austriacs, mê fer schnöss dad els! Na ils provocher, dschand per exaimpel, cha lur festas sülla plazza da scoula cun musica tirolaisa sajan be fracasch e disturban il sön da quels chi reclaman düraunt l'an, cha a Sankt Mooritz nu gira mê ünguotta. Ils Austriacs nu’s laschan spermaler uschè svelt, na, els sbassan evidaintamaing e cun tuot il respet invers il chantunais il volüm dals amplifichaduors, daun üna risattina maligna e – apaina cha tü ils hest do las arains – daun els «botta per tschücha»! S-chüsè, cheras lecturas, chers lectuors, insè vulaivi scriver hoz da la granda festa rumauntscha chi ho gieu lö sül palc principel dals champiunedis mundiels da skis sül parc dal Kulm. Sü sper «Edy» (il futur museum da skis a San Murezzan;-) Insè vulaivi scriver da quella grandiusa preschantaziun dals rockers engiadinais Rico Puorger, Curdin Urech, Christoph ed Andri Casty, Marco Niggli e Fredy Muriset. Els fuorman la band rumauntscha da rock dür «Prefix» e sun stos invidos da la Lia Rumantscha da musser che ch‘els saun. E hoppla, cumplimaint, els haun persvas il numerus public cun ün concert solid, plain energia ed ün gaudi exalto da suner. Ma que nun es da‘s der da buonder. Il palc d'eira nempe telmaing grand, ch'els as varegian sentieus scu la pre-gruppa dals «Stones». In vardet es steda «Prefix» però la pre-gruppa da las «Liricas Analas». Na da congualer, ma neir na mel! Ils rockers engiadinais s'haun dimena arcumandos sainza scha‘s e ma‘s pels grands palcs naziunels. Els haun eir güsta profito da l'occasiun, dal palc immens, dal sound perfet e da las installaziuns da video, ed haun da lur vart registro il concert in möd audiovisuel. Per dapü infurmaziuns saja cusglieda la pagina d'internet www.prefix-rock.ch.Savais, cha'l pled schleppa deriva dal tudas-ch messaun, dimena dal 13evel tschientiner, circa? E savais eir, che chi’d es üna schleppa austriaca? Precis, üna watschn, üna fotzn e tuot tenor eir üna maulschelln. La vendetta austriaca ho cumanzo venderdi già sün pista: Hirscher e Leitinger süsom quist s-chelin melnüz, e dafatta Schörghofer ho auncha gieu il curaschi da’s pusiziuner aunz il meglder svizzer, l'ochevel Murisier. Bain, que es sport, e damaun già schmancho. Ma cha'l Haus Tirol ho darcho fat brav festa fin zieva las desch la saira – ün s-chandel! Dafatta üna impertinenza da nu crajer es capiteda a l'ur dal concert dals «Prefix». Nos egen furnitur discounter d'energia ed immens sponsur dals champiunedis mundiels da skis, la BKW, invida in l'ambiaint chod da sia bar sül Kulmparc. Üna porta da vaider be davent dal sbischöz da naiv e dals suns e tuns dals «Prefix». Que, scu tel, nu füss natürelmaing niauncha mel. La granda schleppa, l'affrunt invers ils musicists indigens our i'l fraid e la granda offaisa da las uraglias sensiblas es il fat, cha illa bar giraiva musica da conserva ¬otezzas – scu, apropos, eir our da la tenda dal producent da biera güsta daspera. E, scu cha que nu füss già avuonda maungel da respet, sorta lo dals amplifichaduors la vusch da Gerhard Gerry Friedle. Logic, ün Austriac! Meglder cuntschaint es Friedle scu DJ Ötzi. Dadour «Gloria» dals «Prefix» e dadains Ötzi e sieu spavantus «Einen Stern, der deinen Namen trägt, Hoch am Himmelszelt, Den schenk ich Dir heut'Nacht…» Buna not, chers chantunais, la vendetta as es gratageda! E cu!      Hoz sanda ho lö cul slalom da las duonnas la penultima cuorsa dals champiunedis mundiels da skis. A las 16.00 concertescha la gruppa «Watch my hair» ed a las 17.00 e las 19.00 «Giganto & Mattiu» illa zona da peduns.