"Auf, Kinder des Vaterlands"

Che onur! E che chatschöz! 20 scolaras e scolars da l'Academia Engiadina da Samedan as squitschan illa luocha dal skiunz da lain «Edy» e stumplan bod sur la spuonda giò a lur dirigent e promotur Werner Steidle. Sur ils amplifichaduors fo Knackeboul atmosfera i'l parc dal Kulm a San Murezzan e pissera per buna glüna. Quella haun surtuot ils fans da la squedra francesa chi ho guadagno zievamezdi l'occurrenza da las squedras. Ot sü sur il plazzel da festa ed ot sur il palc dals champiunedis mundiels da skis regna ün'atmosfera agiteda. Steidle quieta, fo curaschi e tira adimmaint duos passaschas pü difficilas da la chanzun ch'els chantaron in pochs minuts. El as sfruscha ils mauns cunter il fraid. 
«Eau nu vess mê cret ouravaunt, cha taunts as vessan libramaing miss a disposiziun per gnir cò a chanter las imnas», ho dit Steidle poch aunz, cun traverser la via in direcziun dal plazzel da festa. Illa sela da pravenda, situeda be güst illas arains dad «Edy», as vaiva raduno il cor aunz ün'ura per fer marenda e s-chuder las vuschs. «Allons enfants de la Patrie, le jour de gloire est arrivé!» rimbomba que illa sela. Que chi tuna al cumanzamaint auncha dret paschaivel, as munta già a la fin da la prüma strofa in que, cha l‘imna da la republica francesa es – nempe üna chanzun da guerra: «A las armas, vschins, furmè voss battagliuns, marchains, marchains, cha‘l saung impür bagna noss suolchs…» Scritta la chanzun ho Claude Joseph Rouget de Lisle dal 1792 tar la declaraziun da guerra a l'Austria. Ed il nom «La Marseillaise» ho la chanzun survgnieu, pervi cha'ls sudos da Marsiglia l‘haun chanteda cur ch’els sun rivos a Paris. Mais non! Las giuvnas chantaduras ed ils giuvens chantaduors sun cò per chanter l'imna in onur dals vandscheders e düraunt la ceremonia da medaglias, e na, per commenter cuntgnieus d'imnas sechaditschas. E da quellas do que diversas, scu cha eir nus Svizzers savains. Da l'imna russa per exaimpel, vess la chantadura Arina Lazzarini da Samedan schont ün pô respet. «Ma eir da quellas chi pretendan passaschas da vusch fich otas», disch la scolara. Bain pussibel cha Arina e sias collegas nun haun dad intuner, ne l'imna russa, ne quella ungiaraisa düraunt ils ultims dis dals champiunedis. A crajer a Werner Steidle es güst l'imna ungiaraisa nempe üna da las pü greivas d'imprender, e que in prüma lingia causa la lingua. Bger pü gugent gessan Arina e consorts nempe sü, illa pitschna foura dal buttatsch dad «Edy» darcho sainza notas. E que faune – nus savains – be cur cha giò suot els e dadour lur champ visuel vain onureda üna atleta svizra, onuro ün atlet svizzer. In quel sen: «Allez les Suisses!»      Hoz marculdi nu do que üngünas s-chüsas da nun esser preschaint illa zona da peduns a San Murezzan. Hoz es nempe il di da repos sainza cuorsas da skis. Però, a las 16.00 ed a las 16.30 haun lö ils seguonds «Crashcuors» da la Lia Rumantscha culs actuors Annina Sedlacek e Lorenzo Polin. A las 17.00 ed a las 19.00 concertescha il „Bibi Vaplan Trio“.