Chauns chods, tschiervs e licör dal docter

Che surpraisas! La lezcha oriunda da quista contribuziun tunaiva insè tuot simpla e surmanaivla: girer ils hotspots culinarics dals champiunedis mundiels da skis a San Murezzan e scuvrir prodots indigens – scha pussibel dafatta da quels oriunds rumauntschs. Logic, cha la schelta, fatta scu in seguit, nun es cumpletta. A la fin haun ils champiunedis melapaina cumanzo e quel chi retschercha ho evidaintamaing auncha oter da fer cu da girer da buda a buda e s‘implir il magun. Dimena as po tuottüna constater, cha aint il minz dal cumün scu eir i’ls contuorns dal böt da las cuorsas sü Salastrains, ho lö in quists dis ün vair street-food-festival. Üna festa chi’s ho iffitteda, ma sainza as perder illa situaziun penibla d’üna «chamanna da festa». Üna festa cun carisma muntagnard, culurit naziunel e derasaziun internaziunela chi, finelmaing desista eir da la demonstraziun üsiteda da grandaschia à la «Top of the World». Per quella pisseran avuonda, cò e lo, ils exponats luxurius dals sponsuors. Ma, cu ho dit l’oter: «Que fo part dal gö!» Fich positiva es invezza la strategia generela dals predschs modests e l’ideja d’inchascher duos francs depot sün mincha bacher da bavrandas. Insomma vain prasto al mumaint a San Murezzan – sün tuot ils champs – ün grandischem act logistic e, tuot in tuot, üna piramida da lavur collieda cun üna vaira offensiva d'ospitalited –  que schi vela la distincziun «Top of he World»! Scha già be que resta scu legat dals champiunedis, alura trains nus il chapè. Turnainsa però darcho a la lezcha oriunda: Dafatta ils «WM-Burgers», vus savais, quels «Best in Town», savuran a San Murezzan da charn indigena ed eir il Hot-Dog, dimena il chaun u il chagnöl chod, porta l’etiquetta locala. Il «Pulled Hirsch Burger» invezza, es üna sparta per se. Sainza dubi ch’el gustaro grandius. Be il nom, quel m’algorda memma ferm a la fusiun linguistica da las noviteds cuortas cha mieu figl am trametta da temp in temp sül telefonin. Que vela listessamaing eir pels «Bündner Capuns». Il collega David Spinnler da RTR ho scuviert i’l parc dal Kulm üna nouva specialited engiadinaisa: darcho ün chaun chod, be cha quista vouta l‘ho miss sieu inventur, il bacher Reto Zanetti da Sent, da prüm innò i’l paun, e cot zieva chaun e paun in d’üna. Svess d’heja miss il nes i’l «Engadiner Chartreuse». Quist licör amar dad ervas ho prodot Andreas Mutschler, il conproprietari da la pastizaria Hanselmann a San Murezzan a maun d’üna recetta da sieu tat, il docter Ludwig Mutschler. E per chi chi ho ün’allergia dad alcohol, per quel ho pront il bisabiedi dal docter üna versiun lusingianta in fuorma d’ün bel e bun pralinè.   So, basta. Hoz cumbattan las duonnas illa cumbinaziun alpina, la Patrouille Suisse trenescha illas nüvlas e rapper Gimma prelegia – schi, el prelegia a las 16.00 illa zona da peduns. A las 20.15 vain musso illa baselgia evangelica ün film sur dals gös olimpics dal 1948 a San Murezzan cun accumpagnamaint musical a l'orgel.