Quatter minuts insolits

In mardi bunura am d’he dumando la prüma vouta quel di: «Cu as stu sentir la glieud ucrainaisa illa guerra?» Quist impissamaint am es gnieu cur cha duos eroplans da guerra sun svulos cun grand fracasch sur mieu balcun. Hai, eau d’he trat ün pô ün sagl. E quista canera, chi vo tres pel ed ossa, nu ­s’affaiva cun la bunura idillica: Eau sül balcun a baiver cafè cun vista sül Piz d’Esan.

Il rest dal di es però passo scu üsito. Causa cha nu vaiva ünguotta da manger a chesa, staivi vers las ses e mez illa colona davaunt la cassa dal Migros a Samedan. La granda part dals cliaints, scu eau, d’eira riveda per cumprer in prescha sia tschaina. Tuot in ün dandet s’haun stüzzedas tuot las glüschs (als 3 meg 2022 es cruded’oura la forz’electrica in Engiadina’Ota per quatter minuts, que communichescha eir la Repower ün di zieva), üna sirena agressiva ho strasuno our da la partiziun dals mezs electronics e grandas tendas – eau m’impais cha quellas saregian part dal concept da sgürezza cunter incendis – s’haun büttedas sur l’entredgia. Plaunet s’haun stendieus qualche chos traunter las curunas oura – tuots cun üna expressiun inquieta. Eau varegia eir gieu ün tela expressiun, dafatta ils impieghos d’eiran per ün cuort mumaint melsgürs. Be qualche lampas da reserva as vaivan auncha impizzedas. Cun lur glüsch sterila nun haune neir fat gnir pü agreabel la situaziun.

Üngün nu savaiva che cha d’eira capito. E darcho am es gnieu l’impissamaint, cu cha la glieud in l’Ucraina as ho da sentir, scha la forza electrica as stüzza e tuot in ün dandet es que s-chür e melsgür. Eau nu’m vögl insomma na congualer cun la glieud in ­guerra, mieus quatter minuts sun stos ün problem da luxus. Ma listess, cun tuot la situaziun sül muond, as bada cha’l subconsciaint filtrescha e connectescha minch’infurmaziun. Uschè am paraiva ch’eir otras persunas vaivan simils impissamaints scu eau. Il vendeder m’ho quinto, cha qualchosa simil nu saja auncha mê capito. In ün muond svizzer, inua cha la forza electrica es la basa da la societed e que 24 uras al di, capita uschè qualchosa propi fich d’inrer. Cun tuot las noviteds actuelas, eir areguard üna terza guerra mundiela, basta üna tela particularited per mner our dal concept als Svizzers. Almain per quatter minuts.

Zieva bundant quatter minuts es la glüsch darcho turneda our dal ünguotta – precis uschè scu ch’ella d’eira sparida. Surleivg. La glieud ho cumanzo a pajer, il ravuogl da cliaints s’ho darcho sparpaglio in tuot la butia. Eir eau d’he pajo e sun ieu. E chi so, sch’eau nu vess vis quels duos jets da guerra, nu vessi forsa gieu ün curius sentimaint in quel mumaint. Martin Camichel, redacter da la FMR