Referendum da finanzas

La suprastanza cumünela da Schlarigna ho trat als 24 favrer 2025 üna decisiun concernent la seguainta fatschenda: 
Daspö ün pêr ans do da penser l’avegnir da la construcziun da la bobera da l’Olympia bob Run San Murezzan-Schlarigna. D’üna vart vegnan ils respunsabels per la construcziun da la bobera eir pü vegls ed a nun es simpel da chatter successuors, e da l’otra vart haun ils müdamaints climatics cun suvenz temperaturas pü otas ün effet negativ sülla stabilited da la bobera. Il favrer fich amabel dal 2024 ho gieu per consequenza cha la bobera ho pudieu gnir druveda be pü in möd limito ed ho stuvieu gnir serreda pü bod. L’inviern 2024/25 guarda our bger meglder. Que demuossa cha la bobera pudaro cun tschertas restricziuns sgür gnir fabricheda in möd natürel eir i’ls prossems ans. Quists segns daun però eir andit a la cumischiun da gestiun da sclarir pussibels sfradimaints artificiels cumplementers chi simplifichessan la construcziun e’l mantegnimaint da la bobera e chi sgüressan la stagiun da gestiun. Sün proposta da la cumischiun da gestiun e zieva avair passo pled culla suprastanza cumünela da San Murezzan ho la suprastanza cumünela da Schlarigna appruvo ün credit da suprastanza da CHF 28'000.00 (1/3 dals cuosts totels) per la realisaziun d’ün stüdi da realisabilted per ün sfradimaint artificiel tres indschegners e tecnikers da sfradimaint versos. Tenor l’art. 
23 da la constituziun cumünela es quista decisiun suottamissa al referendum da finanzas.
Il temp da referendum düra 30 dis, e que dals 5 marz 2025 als 3 avrigl 2025. 

La suprastanza cumünela da Schlarigna 

Schlarigna, ils 4 marz 2025