06.03.2025
Tenor sia decisiun dals 17 favrer 2025 ed in basa als art. 16 e 28 OPTGR (KRVO) ho la suprastanza cumünela l’intenziun d’invier i’l quartier Chiss üna procedura pel plaun da quartier cun regruppamaint dal terrain.
Intent:
Avertüra da las parcellas 155, 156, 1412, 1413,
1414 e 1500, fin uossa aviertas insufficiaintamaing.
Territori cumpiglio:
Parcellas 155, 156, 1412, 1413, 1414, 1500
e parcella parziela 91.
Resalva:
La vschinauncha ho sclarieu a bun stim ündesch variantas d’avertüra. Sün basa da ponderaziuns da la planisaziun dal territori (art. 1 al. 1 LPT) scu eir sün basa da la relaziun traunter ils cuosts e’l nüz vain actuelmaing favuriseda la varianta d’avertüra nr. 9 cul territori cumpiglio premanzuno.
Scha pervi dals giavüschs dals proprietaris/da las proprietarias i’l ram da la cooperaziun (cf. Art. 17 al. 1 OPTGR) u pervi da las analisas tecnicas pü profuondas auncha pendentas as vess da gnir a la conclusiun cha ün’otra varianta d’avertüra füss pü adatteda, schi s’arsalva la suprastanza cumünela da reponderer la decisiun d’inviamaint e d’adatter correspundentamaing il territori cumpiglio.
Actas d’exposiziun:
- Plaun cun territori cumpiglio 1:1'000
- Variantas 1 fin 11, plauns da situaziun e profils da lungezza 1:500
- Stima dals cuosts, 30 settember 2024
- Pusiziun da Caprez Ingenieure SA, 7 november 2024
Temp d’exposiziun:
30 dis, dals 7 marz 2025 als 7 avrigl 2025, tar l’administraziun cumünela da Samedan düraunt las uras d’avertüra reguleras. 
Recuors:
Cunter l’inviamaint previs dal plaun da quartier cun regruppamaint da terrain Chiss po gnir inoltro a la suprastanza cumünela ün recuors in scrit e motivo (art. 16 al. 2 OPTGR ed art. 30 al.1 OPTGR), e que düraunt il temp d’exposiziun surmanzuno. 
Samedan, ils 24 favrer 2025

In nom da la suprastanza cumünela  

Gian Peter Niggli, president cumünel       
Claudio Prevost, actuar cumünel 
PDF herunterladen